"ЭЛДИК КАБАРга" жооп: ӨКМ: “Токтогулдагы Толук айылында жашоо кооптуу экендиги жергиликтүү тургундарга эскертилген”

Токтогул районундагы Толук айылында жашоо кооптуу экендиги жергиликтүү тургундарга эскертилген. Мындай маалыматты бүгүн, 9-майда Өзгөчө кырдаалдар министрлигинин басма сөз кызматы SUPER.KG`ге кабарлады. Ага ылайык, ӨКМ кооптуу жерлерди текшерип, эскертүү берилгенин, бирок кооптуу аймакта жашаган тургундарды көчүрүү иштерин жана башка жаралган маселелерди жергиликтүү бийлик чечерин билдирди.

“Токтогул районунун Толук айылында жер көчкү түшүүсү мүмкүн экенин биздин адистер жергиликтүү тургундарга эскертишкен. Жалал-Абад облусу боюнча баш-аягы 500дөн ашуун кооптуу жерлер болсо, Толук айылы да алардын катарына кирет. Ал эми эскертүүлөр берилген жерде жашап жаткан элди жергиликтүү бийлик көчүрүп чыгуусу керек. Алар эмнеге дагы деле ал жерден көчпөгөндүгүн жергиликтүү бийликтен сурасаңыздар так жооп ала аласыздар”, - дешти ӨКМдан.

Эскерте кетсек бүгүн, 9-майда окурман SUPER.KG`ге Токтогул районунун Толук айылында жер көчкү коркунучу күтүлүп жатканын кабарлаган.