Жалал-Абад шаарындагы курортто чыр чыкты

Жалал-Абад шаарындагы курортто баш аламандык орун алууда. Бул тууралуу бүгүн, 11-майда SUPER.KG порталына активист Тимур Саралаев билдирди.

"Жалал-Абад шаарындагы курорттун жетекчиси Максат Абышкаевди кызматтан бошотпой туруп, башка кишини жетекчи кылып дайындап коюшуптур. Мындан улам пикир келишпестиктер орун алып, баш аламандык болууда. Азыркы учурда 30-40тай спорттук кийимчен жигиттер жана жумушчулар жетекчинин мыйзамсыз жумуштан алынышына каршылык билдиришүүдө", - деп билдирди Саралаев.

Ал эми Кыргыз профсоюздар федерациясы курорттун жетекчилиги мыйзамсыз жумуштан алынбаганын айтып чыкты.

"Кыргыз профсоюздар федерациясы курорттун жетекчисин кызматтан бошоткон эмес. Ал айылдык кеңештин депутаттык мандаты үчүн ат салышып жаткандыгына байланыштуу мыйзамга ылайык, анын кызматтык ишмердүүлүгү 28-майга чейин токтотулган. Ошол эле учурда курортко текшерүү жүргүзүлгөндө, баалуулуктар, азык-түлүк жетпей калганы ачыкталган. Мындан сырткары жетекчилик өзүнүн туугандарын, жакындарын жана айылдаштарын кызматтарга коюп алган", - деп билдиришти федерациядан.