Талантбек Батыралиев моралдык чыгым катары үч бирикмеден 3 миллион cом өндүрүү үчүн доо арыз жазды

Саламаттыкты сактоо министри Талантбек Батыралиев “Акос”, “Кыргыз чоролору, “Шаик Ата” бирикмелерин сотко берди. Бул тууралуу 12-майда SUPER.KG'ге “Кыргыз чоролору” бирикмесинин жетекчиси Кубанычбек Дүйшеев билдирди.

Анын айтымында, министр аталган бирикмелерди "такталбаган маалыматтарды таратып, аброюма шек келтиришти" деп, ар биринен 1 миллион сомдон моралдык чыгым өндүрүп берүү талабы менен сотко кайрылган.

"Бул тууралуу бизге кат аркылуу, Талантбек Батыралиевдин жактоочусу кабарлады. Ал "такталбаган маалыматтар менен менин үстүмөн ар кайсы инстанцияларга кайрылып, аброюма шек келтиришкени үчүн" деп, үч бирикменин жетекчисин, “Акос” бирикмесинин жетекчиси Кубанычбек Шаршембаев, “Шаик Ата” бирикмесинин жетекчиси Темир Султаналиев жана менден 1 миллиондон, жалпысынан 3 миллион сом моралдык чыгым өндүрүп берүүнү талап кылып сотко арыз менен кайрылыптыр”, - дейт Кубанычбек Дүйшеев.

Эскерте кетсек, буга чейин аталган үч бирикме Батыралиевди коррупцияга күнөөлөп, аны министрликте өзүм билемдик кылып, жетекчи катары кадрдык маселени начар жүргүзүп жатканын, реформа жасай албаганын айтып, министрликтеги башка бир нече маселелерди көтөрүшүп, президентке, премьер-министрге, Жогорку Кеңешке, Башкы прокуратурага , УКМКга кат жолдошкон. Андан сырткары Батыралиевди кызматынан кетсин деп, бир нече жолу митинг уюштурушкан. Натыйжада Батыралиевдин үстүнөн болгон кайрылуу боюнча КСДП фракциясынын жыйынында каралып, аталган маселени Жогорку Кеңештин депутаты Рыскелди Момбеков парламенттин трибунасында да көтөргөн.