Футбол боюнча Европа Лигасынын финалында англиялык “Манчестер Юнайтед” менен голландиялык “Аякс” ойнойт

12-майга караган түнү УЕФАнын Европа Лигасынын жарым финалында жооптук оюндар өттү. Жыйынтыгында финалда англиялык “Манчестер Юнайтед” менен голландиялык “Аякс” ойномой болду. Бул тууралуу мелдештин расмий сайты кабарлайт.

Жооптук беттеште “Олд Траффорд” стадионунда “Манчестер Юнайтед” өз үйүндө испаниялык “Сельта” менен 1:1 эсебинде тең чыкты. Бул эки команданын ортосундагы алгачкы беттеш 1:0 эсебинде Жозе Моуриньонун командасынын жеңиши менен аяктаган. Жыйынтыгында “МЮ” финалга карай бет алды.

Ал эми экинчи оюнда франциялык “Лион” өз талаасында “Аяксты” 3:1 эсебинде утканы менен финалга чыга алган жок. Биринчи оюнда алар “Аякска” 1:4 эсебинде жеңилип калган.

Финал 24-майда Швециянын Стокгольм шаарында өтөт. Европа Лигасынын жеңүүчүсү кийинки сезондо Чемпиондор Лигасына жолдомо алат.