Өкмөт башчы Мамлекеттик камсыздандыруу уюмунун жетекчисин кызматтан алуу сунушун берди

Өкмөт башчы Сооронбай Жээнбеков Мамлекеттик камсыздандыруу уюмунун жетекчиси Бакыт Жумашевди кызматтан алууну Мамлекеттик мүлктү башкаруу фондуна тапшырды. Мындай чечим бүгүн, 12-майда өзгөчө кырдаалдарды алдын алуу боюнча жыйында айтылды. Жыйындын жүрүшүндө өкмөт башчы Сооронбай Жээнбеков 2016-жылы аталган уюмга 100 миллион сом берилгенин, бир жылдын ичинде араң 8 миллион сомго камсыздандыруу иштерин жүргүзгөнүн айтып сынга алды.

Буга чейин да премьер-министр айыл жергесиндеги элдин турак жайларын камсыздандыруу боюнча маалыматтар көпчүлүгүндө жоктугун айткан.

Бүгүнкү күндө өлкө боюнча 4638 турак жай камсыздандыруу уюму менен келишим түзгөн. 2017-жылдын 1-кварталында үч жаранга 133 006 сомдук камсыздандыруу төлөмүн берген.

Эскерте кетсек, Мамлекеттик камсыздандыруу уюму 2015-жылы 50 миллион сомдук уставдык капитал менен түзүлгөн. Айыл жергесиндегилер жылына 600 сом, шаардыктар 1200 сом төлөп, турак жайын камсыздандырышы керек болот.