Аксы районунун Авлетим айылында өзгөчө кырдаалдар тартиби киргизилди

Аксы районунун Авлетим айылында өзгөчө кырдаалдар тартиби киргизилди. Бул тууралуу бүгүн, 13-майда Өзгөчө кырдаалдар министрлигинен билдиришти.

Маалыматка караганда, 11-12-май күндөрү абанын температурасы жогорулап, тоолордо кар эрип, Авлетим дарыясында суунун деңгээли көтөрүлгөн. Мындан улам Байкашка-Терек айылында 36 турак жайга, Арал айылында 43 турак жайга коркунуч жаралган.

Андан сырткары Товар-Сай айылындагы Чоң-Таш тилкесинде Авлетим дарыясына салынган ички чарбалык көпүрөнүн оң тарабын суу жей баштады.

"Авлетим айыл аймагынын башчысынын 2017-жылдын 12-майындагы №42-буйругунун негизинде, Авлетим айылдык аймагында өзгөчө кырдаалдар тартиби киргизилди. Жарандык коргонуу комиссиясы тарабынан Байкашка-Терек айылында 7 үйдүн жашоочулары, Арал айылында 8 үйдүн жашоочулары убактылуу туугандарынын үйлөрүнө көчүрүлгөн", - деп айтылат ӨКМнын маалыматында.

Ошондой эле Өзгөчө кырдаалдар министрлиги тарабынан 2 техника бөлүнүп, жээктерди бекемдөө иш-чаралары жүрүүдө.