Cузакта 122 кой ууланып өлдү

12-майда Жалал-Абад облусунун Сузак айыл өкмөтүнө караштуу Ат-Чабар айылында уулуу заттар көмүлгөн аймактан оттогон 122 кой ууланып өлдү. Бул тууралуу ӨКМнын басма сөз кызматы билдирет. Чабан Токторалы Хажиматов бул койлорду элден чогултуп, жайлоого көчкөнгө чейин убактылуу ушул аймакта багып турмакчы болгон. Уулуу заттар көмүлгөн аймак атайын тосулбагандыктан, алюминий идиштерди (фляга) алуу максатында белгисиз жарандар тарабынан мурда казылган. Учурда ал жерде райондук жарандык коргоо комиссиясы иш алып барып, өлгөн койлорду көмүү жана калк арасында уулуу заттар көмүлгөн жерге жакындабоо, мал жайбоо боюнча түшүндүрүү иштери жүргүзүлүүдө. Учурда келтирилген чыгымдар менен кырсыкка күнөөлүүлөр боюнча иликтөө иштери жүрүүдө.