Ошто кулаган аттракцион 2016-жылдан тарта "Балдар келечеги" жоопкерчилиги чектелген коомуна тиешелүү экени аныкталды

Ош шаарынын "Жеңиш" сейил багында аттракцион кулап, 4 адам жабыркаган. Аталган сейил бак жоопкерчилиги чектелген коомго ижарага берилген. Бул тууралуу бүгүн, 15-майда Ош шаардык мэриянын Шаардык курулуш жана муниципалдык менчик бөлүмүнүн башчысы Мирлан Исраилов билдирди.

"Жеңиш" сейил багы 2016-жылдын 6-февралында "Балдар келечеги" жоопкерчилиги чектелген коомуна 5 жылдык мөөнөткө ижарага берилген. Сейил бактагы болгон кырсык боюнча аталган коом жоопкерчилик алат. Анткени биздин ишкана менен түзүлгөн келишимде көрсөтүлгөндөй, архитектуралык курулуш, экология, санитардык эреже, өрткө каршы күрөшүү, аттракциондордун абалын көзөмөлдөө аларга милдеттендирилген. Кырсыктын келип чыгышын тиешелүү адистер карап чыгышат. Түзүлгөн келишимдеги эрежелер бузулса, анда биз бул ишкана менен келишимди жокко чыгарабыз", - деп билдирди Исраилов.

Маалыматка ылайык, "Жеңиш" сейил багынын аянты 38 миң 733 чарчы метрди түзөт.