Аксы районунун Кош-Дөбө айыл аймагында 12 метрлик "Эйфел" мунарасынын үлгүсү курулду

Жалал-Абад облусундагы Аксы районунун Кош-Дөбө айыл аймагында "Эйфел" мунарасынын үлгүсү курулду. Бул тууралуу бүгүн, 15-майда SUPER.KG порталына Кош-Дөбө айыл аймагынын башчысы Асанбек Тыныбеков билдирди.

"Соңку убактарда мектепти 10-20 жыл мурда бүткөн бүтүрүүчүлөр айылдын социалдык өнүгүшүнө салым кошуп келе жатат. Бул жолу айыл өкмөт тараптан бүтүрүүчүлөргө сунуш берилип, айрымдар айылдагы эскилиги жетип калган аялдамаларды жаңыдан оңдоп жатышат. Бүгүнкү күндө Иринжит орто мектебин 1997-жылы бүтүргөн бүтүрүүчүлөр "Эйфел" мунарасынын үлгүсүн орнотушту. Курулган мунара учурда Жалал-Абад облусу боюнча жалгыз Кош-Дөбө айыл аймагында болуп калды", - деп билдирди Тыныбеков.

Маалыматка ылайык, аны курууга 300 миң сом жумшалган, бийиктиги пайдубалы менен 12 метрге жетет. Түнкүсүн жарык берүүчү атайын лампалар орнотулган. Учурда айланасын жашылдандырып, гүл тигүү иштери жүргүзүлүүдө.