Тогуз-Тородо ууланып бейтапканага түшкөндөр боюнча лабораториялык анализ жүргүзүлүүдө

Жалал-Абад облусунун Тогуз-Торо районунда бейтапканага түшкөн 16 адам тамактан ууланышы мүмкүн экенин бүгүн, 15-майда SUPER.KG порталына Тогуз-Торо райондук санитардык эпидемиологиялык мекеменин башчысы Асем Садырова билдирди.

"Бүгүнкү күндө бейтапканага кайрылгандар эмнеден уулангандыгын аныктоо аракетин көрүп жатабыз. Биз тамак-аштан ууланышы мүмкүн деп жатабыз, тамактын калдыктарынан алып, лабораториялык изилдөөлөрдү жүргүзүп баштадык. Азырынча аныктала элек. 2-3 күндөн кийин жыйынтыгы чыгарылат", - деп билдирди Тогуз-Торо райондук санитардык эпидемиологиялык мекеменин башчысы Асем Садырова.

Ал эми райондук бейтапкананын башкы дарыгери Адина Умаров төмөнкүлөрдү билдирди:

"Тамактануучу жайдан тамактанып, абалы оорлошуп бейтапканага жаткандар кусуп, ич өткөккө кабылышкан. Дарыгерлер алгачкы жардам кызматтарын көрсөтүшкөн. Бейтаптардын бири лагман жегенин айтууда. Ал эми башкалары жарма ичип, котлет жегенин кошумчалашты".