Билим берүү жана илим министрлиги мектептерди 5 күндүк окуу тартибине өткөрүүнү колдойт

Билим берүү жана илим министрлиги мектептерди 5 күндүк окуу тартибине өткөрүүнү колдойт. Бул тууралуу бүгүн, 15-майда Жогорку Кеңештин Социалдык маселелер, билим берүү, илим, маданият жана саламаттыкты сактоо боюнча комитетинин жыйынында министр Гүлмира Кудайбердиева билдирди.

"Жалпысынан мыйзам долбоордун концепциясын колдоп, макулбуз. Өкмөттүн чечимине ылайык, 2016-2017-окуу жылынын экинчи жарымынан тартып бардык мектептердин башталгыч класстары 5 күндүк окуу режимине өткөн. Окуу программаларын кыскартуу келечекте каралат. Билимдин сапатына көңүл буруубуз зарыл. Кереги жок материалды алып салуу каралышы мүмкүн", - деди ал.

Министр Кыргыз мамлекети боюнча 3 нөөмөт менен окуган мектептердин саны 97ни түзө турганын айтты. Эгерде мектептер 5 күндүк окуу тартибине өтсө окуу 1 саат узартыла турганын кошумчалады.

"Билим берүү жөнүндө" мыйзамына киргизүү мыйзам долбоорунун демилгечиси Евгения Строкова мектептер 5 күндүк окууга өтө турган болсо программалар кыскартылбай турганын белгилеген.

Жыйынтыгында мыйзам долбоору аталган комитеттин депутаттары тарабынан колдоо тапты.