Уктап жаткан адамдын маанайын бузбай, жеңил ойготуучу смарт-жаздык ойлоп табылды

Уктап жаткан адамдын маанайын бузбай, жеңил ойготуучу "Sunrise Smart Pillow" аттуу жаздык ойлоп табылды. Бул тууралуу чет элдик басылмалар кабарлашты.

Маалыматка караганда, жаздык көп функцияларды аткара алат. Башкача айтканда, ал колдонуучунун уйкусунун сапатын жакшыртып, эртең менен адамды табигый жол менен ойготот. Ал капталдарында жарык чыгаруучу диоддор менен жабдылган.

Ойгоно турган мезгил келгенде жаздыктагы жылуу жарык акырындык менен жана баштайт. Ал күн чыгып, анын жылуулугу бетке тийип жаткандай таасир калтырат. Жаздык уктоочу бөлмө караңгы, терезелериндеги пардалар жабык болсо да, табигый жол менен ойгонууга шарт түзөт. Аны башкаруу, ойгоно турган убакты белгилөө мобилдик тиркеме аркылуу ишке ашат. Жаздыкта орнотулган жарыктарды уктаар алдында керебетте жатып алып китеп окуу үчүн дагы колдонсо болот. Жаңы ойлоп табуунун баасы 99 долларды түзөт (болжол менен 6 жарым миң сом).