УКМК Текебаевге ачылган кылмыш ишин Башкы прокуратурага кароого берди

Улуттук коопсуздук мамлекеттик комитети депутат Өмүрбек Текебаевге ачылган кылмыш ишин Башкы прокуратурага кароого берди. Бул тууралуу SUPER.KG порталына УКМКнын маалымат кызматынын жетекчиси Рахат Сулайманов билдирди. Материалдар бүгүн, 16-майда берилген.

Башкы прокуратура ишти карап чыгып, сотко өткөрүп берери күтүлүүдө.

Эскерте кетсек, 2017-жылдын 25-февралында Кыргыз Республикасынын Башкы Прокуратурасы тарабынан "Ата Мекен" фракциясынын лидери Өмүрбек Текебаевге "коррупция" жана "алдамчылык" беренелери боюнча кылмыш иши козголуп, ошол эле күнү УКМКнын Тергөө башкармалыгына өткөрүлүп берилген. 26-февралда козголгон кылмыш ишинин алкагында Текебаев менен Чотонов камалган. 27-февралда Өмүрбек Текебаевди жана Дүйшөнкул Чотоновду Бишкек шаардык Биринчи Май райондук соту 25-апрелге чейин камакка алуу чечимин чыгарып, чечимди кийин Бишкек шаардык соту күчүндө калтырган.

УКМК "тергөө бүтө элек" деп Текебаевдин мындан кийинки баш коргоо чарасын аныктоо боюнча сотко кайрылып, 21-апрелде Биринчи Май райондук соту депутатты 25-майга чейин камакта кармоо чечимин чыгарганы белгилүү.