Бишкек шаарынын Ленин районундагы бала бакчанын короосунан жыландар чыкты

Бишкек шаарынын Ленин районунун Киргизия айылындагы бала бакчанын короосунан жыландар чыкты. Бул тууралуу бүгүн, 17-майда SUPER.KG порталына Улуттук илимдер академиясынын Биология жана топурак таануу институтунун директорунун милдетин аткаруучу Бекмамат Жээнбаев билдирди.

"Бизге Ленин районунун Киргизия айылындагы №26-балдар бакчасынын короосунан жыландар чыгып, аларды изилдөө тууралуу кайрылуу келди. Учурда биздин адистер жыландарды жеринде көрүү үчүн жөнөп кетишти. Бала бакчада эмгектенгендер балдардын ден соолугуна жана өмүрүнө коркунуч жаралып кетишинен кооптонуп жатышат. Адистер жыландардын канчалык коркунучтуу экенин, ошондой эле уулуу жыланбы, адамга кайсы учурда кол салууга чыгарын изилдешет", - деп билдирди Жээнбаев.

Маалыматка ылайык, аталган институтта жылан кескелдирик, бака менен иштөө адиси жок. Жылан чыккан бала бакчага бака жана кескелдирик менен иштөө адистигине жакын кызматтагы адистер жиберилген.