Тоскоолдун тургуну: "Уулангандардын санын эмне себептен азайтып жатышат билбейм"

Жалал-Абад облусуна караштуу Ноокен районунун Тоскоол айылында эс-учун жоготуп ооруканага түшкөндөрдүн саны 32ге жеткен. Бүгүнкү күндө алар эмнеден ууланганы белгисиз бойдон калууда. 15-майда Ош облустук санитардык-эпидемиологиялык көзөмөлдөө борбору "окуучулар суудан ууланган эмес" деген жыйынтык чыгарган. Ошол эле күнү айрым окуучулар ооруканадан чыгарыла баштаган.
Ал эми жергиликтүү тургундардын SUPER.KG порталына берген маалыматы боюнча, уулангандардын саны 48ге жетип, ооруканадан чыгарылгандар кайрадан эс-учун жоготуп ооруканага кайрылышкан.

"Ууланган балдардын саны 48ге жеткен. Арасында менин карындашым да бар. Эмне себептен санын азайтып жатышат билбейм. Үйлөрүнө чыгарылды деп жатышат, бирок көбү үйүнө жетпей кайра кайтып жатышат. Учурда биздин билишибизче, 20га жакын окуучу дагы деле ооруканада", - дейт тургундардын бири.

Оорукананын башкы дарыгеринин айтымында, учурда 5 гана окуучу дарылоодон өтүп жатат.

"Иним сабакка кеткен, саат 13:00дөрдө сабагы башталмак. Бирок ага жетпей эле эс-учун жоготуп кулаптыр. Жардам көрсөтүлгөн. 2 күндөн кийин эле кайра "ичим, башым ооруп жатат" деп калды. Ошол күнү эле ооруканага жатты. Башкалар кусуп да жатышкан экен. Эми аларды ууланды деп жатышат, бирок эмнеден экени белгисиз. Учурда иним ооруканада", - деди Гүлжан аттуу тургун.