Таласта милициянын кызматтык унаасында жол кырсыгынан каза болгон милиционердин бир тууганы акыйкаттык издөөдө

Талас шаарында жумуш учурунда милициянын кызматтык унаасында жол кырсыгынан каза болгон Рустам Дүйшөналиевдин бир тууган агасы Агзам Дүйшөналиев маалымат жыйынын уюштуруп, ишти карап жаткан органдарга нааразычылыгын билдирди.

"Менин бир тууганым былтыркы жылдын 21-январында милициянын майору Бактыяр Жунусов айдап бараткан милициянын кызматтык унаасында жол кырсыгынан каза болгон. Ошол маалда унаада үч адам болгон. Жунусов өзү Бакай-Ата РИИБинин кылмыш-иликтөө бөлүмүнүн башчысы болуп иштеген. Окуядан кийин иним Рустам алты күн Талас шаардык ооруканасында жандандыруу бөлүмүндө жатып өзүнө келбей каза болгон. Эми муну жөн эле жол кырсыгы деп тим койгонго болбойт. Себеби булар кызмат учурунда милициянын унаасы менен баратып, жолдун четиндеги столбаны сүзүшкөн. Рулда бараткан Жунусов ушул күнгө чейин айдоочулук күбөлүк ала элек экен. Кантип айдоочулук күбөлүгү жок кишиге кызматтык унааны айдоого беришкен, түшүнүксүз. Бул факты боюнча "Транспорт каражаттарынын кыймылынын жана аларды пайдалануунун коопсуздук эрежелерин бузуу" беренесинин негизинде кылмыш иши козголгон, бирок ушул күнгө чейин күнөөлүү жазасын ала элек", - деди маркумдун агасы.

Козголгон кылмыш иши боюнча жыйынтык чыкпаган соң жабырлануучу тарап президентке кат менен кайрылганын билдирди. "Президенттик аппараттан жооп иретинде Жогорку сотко материалды карап чыгуу үчүн кат жөнөтүлгөн. Бирок ары-бери берилген тапшырмалардын соңунда кылмыш ишин кайра эле Талас райондук сотуна кароо үчүн келип түшкөн. Учурда Талас райондук соту Комиссиондук соттук авто-техникалык экспертизасына текшерүү жүргүзүү токтомун чыгарган", - деди Дүйшөналиев.