Ноокендеги Тоскоол айылында ууланган окуучулардын ата-энелери райондун бир катар кызматкерлерине арыз жазышты

Ноокендеги Тоскоол айылында ууланган окуучулар боюнча жергиликтүү тургундар 15-майда райондун акимине, прокуроруна, ички иштер башкармалыгынын, санитардык эпидемиологиялык станциянын, билим берүү бөлүмүнүн, оорукананын башчыларына арыз жазышканын бүгүн, 17-майда жергиликтүү тургун Тиллекан Акматалиева билдирди.

"Ууланган балдардын көпчүлүгү 6-класстын окуучулары, алар дене тарбия сабагына барышкан. Ал жактан мектептин кудугундагы суудан ичишиптир. Канча бала ууланганын так билбейбиз, бирок жалпыга маалымдоо каражаттарында жазылгандан көп. Ууланган күнү жандандыруу бөлүмүнө түшүшкөн, анан балдар бөлүмүнө которулушкан. Учурда 5 бала ооруканада деп жатышат, бирок балдардын саны 15-20га жетет. Азыркыга чейин уулануунун себеби белгисиз, биз аны аныктап берүү арызы менен кайрылганбыз", - дейт Тиллекан Акматалиева.

Тургундар жазган арызда 58 ата-эне кол коюп, балдарына тиешелүү медициналык жардам көрсөтүү үчүн уулануунун себебин тезирээк аныктоону өтүнүшкөн.