Супер-Инфо
super.kg видео
Андижанда балмуздакка уулангандардын саны 1500гө жетти
Андижандын Шахрихан районунда балмуздакка уулангандардын саны 1500 кишиге жетти. Эки жүз адам ооруканага жаткырылса, көпчүлүгүнө алгачкы медициналык жардам көрсөтүлгөндөн кийин алар ооруканадан чыгарылган. Бул тууралуу 17-майда өзбекстандык басылмалар жазышууда.
Дарыгерлердин айтымында, учурда Шахрихандагы ооруканада 200дөй киши дарыланууда, бешөөнү жандандыруу бөлүмүнө которушту.
Анжиян облусундагы укук коргоо органдары уулангандар Шахрихандын борборундагы кафелердин биринен балмуздак жешкенин маалымдашты. Шаарга саламаттыкты сактоо министринин орун басары, өлкөнүн башкы санитардык дарыгери баш болгон ак халатчандар келишти.
Иликтөөнүн жүрүшүндө балмуздак даярдоочу жайда санитардык нормалар сакталбагандыгы аныкталган.
"Идиш-аяктарды жууп-тазалоого жана балмуздак куймагын сактоого тийиштүү шарттар түзүлбөгөндүгү белгилүү болду. Дезинфекциялоочу каражаттар пайдаланылган эмес. Жеке ишкерде балмуздактын коопсуздугу кепилденген документи жок болгон. Балмуздак эскирүү мөөнөтү көрсөтүлбөгөн чийки заттардан даярдалган. Кафедеги 4 жумушчу медициналык текшерүүдөн өткөн эмес", - деп билдирет Саламаттыкты сактоо министрлигинин басма сөз кызматы.
0
1 |