Жанар Акаев Венгриянын ЖОЖдору бөлгөн бекер орунга жалаӊ чиновниктердин балдары өткөнүн айтып чыкты

Венгриядан Кыргыз мамлекетинин 25 студентин акысыз окутуу келишими түзүлгөн. Бирок бул орундарга өкмөттө, Жогорку Кеңеште иштегендердин балдары өттү. Маалыматты 18-майда парламентте депутат Жанар Акаев айтып чыкты.

Кыргыз абитуриенттерине 25 орун бөлүү келишими былтыр түзүлгөн.

"Келишим түзүлүп жатканда мен Жогорку Кеңеште таанышы барлардын, чоңдордун балдары кетпесин, билимге суусаган балдар өтсүн деп айттым эле. Сынак адилеттүү болсун дегем. Бирок жүздөгөн абитуриенттердин документтери белгисиз себептерден улам Венгрияга жиберилбей калган. Билим берүү жана илим министрлиги кандай сынак өткөргөнү белгисиз. 25 абитуриенттин документин жөнөткөн экен, алардын арасында өкмөттүн жана Жогорку Кеңештин өкүлдөрүнүн балдары кирип калган. Билим берүү министрлигинин статс-катчысынын кызы, бөлүм башчысынын кызы, Жогорку Кеңештин депутатынын кызы, керек болсо айрым айыл өкмөт башчыларынын балдарына чейин тизмеге кирип калганы табышмактуу. Мен чиновниктердин, депутаттардын балдары чет өлкөгө окубашы керек дегенден алысмын. Бирок башкаларга үлгү болуп балдарын ачык сынакка катыштырышы керек болчу. Ата-энеси чиновник эмес балдарыбыз толтура, алардын жолун буубай, келечегине тоскоол болбой жакшы шарт түзүп бериш керек", - деди Акаев.