Аида Касымалиева: "Кытайдан арзан каруселдерди алып келип, балдардын коопсуздугун бизнеске айлантканды токтотуу зарыл"

Бүгүн, 18-майда парламентте КСДП фракциясынын депутаты Аида Касымалиева 1-июнь - Балдарды коргоо күнүн майрамдагандан уялуу керек экенин билдирди.

Эл өкүлү учурда балдардын абалы оор экенин, жер титирөөдөн көз жумгандарды, наристелерди белгилеп өттү. Ошону менен катар эле депутат өлкөнүн бардык парктарындагы аттракциондордун абалын текшерүүнү сунуштады.

"Ош шаарында Навои паркында аттракцион кулап түшүп 8 адам жабыркады. Алардын бирөөсүнүн абалы дагы деле оор бойдон калууда. Аттракциондорду көзөмөлгө алуу боюнча ата-энелер мага кайрылып жатышат. Бул окуя боюнча бир дагы мамлекеттик орган өзүнө жоопкерчилик алган жок. Оштогу техникалык коопсуздук инспекциясынын жетекчиси бул боюнча алар текшербей турганын айтып маек бериптир. Ал сейил багындагы дарактарды текшере турганын айткан. Сейил бакты ижарага алган адам ММКларга интервью бергенден качып жатат. Ушул жерден суроо туулуп жатат. Негизи ким жоопкерчиликти алып, ким аттракциондорду текшериш керек? Текшерүү убактысы келип жетти. Анткени Кытайдан же башка жактан арзанына карап каруселдерди алып келип жатышат. Балдардын коопсуздугун бизнеске айлантканды токтотуу зарыл", - деди ал.