"ЭЛДИК КАБАРга" жооп: "Лейлектин Кулунду айылындагы сайдын аңга айланышына эл өзү күнөөлүү" дейт аким

"Баткен облусунун Лейлек районунун Кулунду айылындагы сайдын аңга айланышына эл өзү күнөөлүү", - деп бүгүн, 18-майда SUPER.KG порталына аталган райондун акими Баймурат Бекмуратов билдирди.

"Мындан эки жыл мурун катуу жаандан улам көпүрөнү, сайларды сел алып кеткен. Бул Кыргызстандын 60 жылдыгы көчөсүнө көпүрө салуу боюнча 8 миллион сомдук долбоор түзүлүп, жакында иш башталганы турат. Эми аңга айланган сай боюнча айтсам, сай деген Кудайдын сайы, аларды эч ким сайдын жээгине жакын жашагыла деген жок. Сайдын аңга айланышына ошол жердеги жашоочулар өздөрү күнөөлүү, себеби чарбагын сугарган суу жеп кеткен. Элдер азыр Өзгөндөгү, Алайдагы кырсык окуяларын угуп алып эле бизге да көңүл бурса экен деп жатышат. Дагы бир жолу айтам, Кулундуда эч кандай кооптуулук жок", - деди райондун акими.

Ал эми Кулунду айылынын жашоочусу Чыныгүл Эрматова жазгы жаандардан дагы сел кайталанбайбы деп кооптонгонун SUPER.KG'ге айтты.

"Чарбактын дубалдарына аң жакындап калган үй - менин эжемдин үйү. Былтыр жазында сел келип ушундай кооптуу жагдай жаратып кеткен. Ал жерде эки үй бар, азыр коркунучта турат. Эки күндөн бери радио-теледен аба ырайы бузулат десе эле кайра коркуп жатабыз. Жергиликтүү бийликке айтсак, былтыртан бери биздин үнүбүздү укпай жатышат", - деди айыл тургуну.

Айта кетсек, "Баткен облусунун Лейлек районунун Кулунду айылынын Кыргызстандын 60 жылдыгы көчөсүнүн жолу жок болуп, жергиликтүү тургундардын үйлөрү коркунучта турат", - деген кабарды сүрөттөрү менен окурман SUPER.KG порталына жөнөткөн эле.