Балыкчыдагы бала бакчанын жетекчиси: "4 жаштагы баланы сабоо фактысы болгон эмес, апасы үйүнө таптаза боюнча алып кеткен"

Бүгүн, 18-майда Ысык-Көл облустук ички иштер башкармалыгы Балыкчы шаарындагы бала бакчада болгон окуянын чоо-жайы такталып жатканын билдиришти. Милиция кызматкерлерине кайрылган Мариям аттуу шаар тургунунун айтымында, "Жоогазын" аталышындагы бала бакчанын тарбиячысы анын 4 жаштагы баласын сабаган.

Бул тууралуу аталган бала бакчанын жетекчиси Майрамкүл Куловага байланышканыбызда, 4 жаштагы баланы сабоо фактысы болбогонун жана апасы үйүнө таптаза боюнча алып кеткенин билдирди.

"Мариям бизге 2 баласын алып келет. Улуусу көнбөй жатып араң көнгөн. Ал эми 4 жаштагысы такыр эле көнбөй койду. 16-май күнү саат 15:00дө баласын алып кеткен. Ошол учурда бетинде эч кандай уруп-согуунун тактары болгон эмес. Эгер сабалганын байкаса дароо мага кайрылса болот эле. Мариям тарбиячыны кетиргиле деп жатат. Бирок биз кетире албайбыз. Анткени ал өз ишине тың, балдарды жакшы окутат. Андан сырткары баланы сабаганы боюнча далилдер да жок. Соттук-медициналык экспертизанын жыйынтыгын күтүп жатабыз", - дейт Майрамкүл Кулова.