Орусиядагы уулун зарыгып күткөн эне: "Уулум, Замкөөбай, сени сагындым. Бир көрүп өлсөм, арманым жок эле"

3,5 жыл мурун Орусияга иштегени кеткен Замирбек Атамкуловдон ушул күнгө чейин маалымат жок. Аны Аксы районунун Кызыл-Жар айылында улгайып калган апасы зарыгып күтүп келет.

Апанын интернетке тарап кеткен видео кайрылуусунда уулун сагынганын айткан.

"Замкөөбай кел, үйлөнгөн болсоң жетелеп келе бер. Замкөө, сени көп сагындым. Таң атса кеч кирбейт же кеч кирсе таң атпайт. Ушундай күнгө калдым. Атаң салган тамда отурам. Ушул жерди ээлеп, кирип чыксаң канча кубат. Мен деле жылдагыдай эмесмин, кубатым жок. Сени бир көрүп өлсөм, арманым жок эле. Сагындым...", - деп айтылат апанын кайрылуусунда.

ИИМдин Орусиядагы өкүлү Аскат Алиевдин маалыматына караганда, 1977-жылы туулган Замирбек Атамкуловду издеп, айылдашы кечээ, 19-майда кайрылган.

"Айылдашынын айтымында, Замирбек 2013-жылдын сентябрь айында иштегени Орусияга кетип, ошол бойдон дайынсыз жоголгон. Алдын ала маалыматтар боюнча, ал Екатеринбург шаарында жүрүшү мүмкүн. Азыркы тапта аны издөө иштери жүрүп жатат", - деди Аскат Алиев.