Орусиядагы уулун күткөн апанын кызы: "Апам биз менен турчу, 2 жылдан бери балам келсе издеп калат деп өз үйүнөн кетпей койду"

Назира Атамкулова 76 жашта. 2 жылдан бери Аксы районунун Кызыл-Жар айылындагы үйүндө жалгыз жашайт. Эки буту ооругандыктан жардамчы араба аркылуу жүрөт. 76 жаштагы апага коңшу жашаган кызы Гүлнара Атамкулова жардамдашып турат. Анын айтымында, иниси Замирбек Атамкулов 2013-жылдын күз айларында Орусияга кеткен боюнча кайрылып келген эмес.

"Орусияга кеткенден бери иним менен эки эле жолу сүйлөштүк. 2015-жылы атам өтүп кетти, ага да келе албай калды. Апам болсо 7 жылдан бери төшөктө, өзүнчө эркин баса албайт. Атайын жардамчы араба менен жүрөт. Быйыл баласын сагынып куса болуп жатат. "Атасын көмбөй калды, мени да көмө албай калабы" деп ыйлаганынан Орусиядагы тааныштарыма кайрылган болчумун. Эне деген сыгылат экен да "бутум бар болгондо издейт элем, бутуңар бар издебейсиңер" деп урушат. Менин да 4 балам бар, каягына жетишем. Мен өзүм карачу элем, 2 жылдан бери "балам келсе издеп калат" деп үйүнөн кетпей койду", - дейт Гүлнара Атамкулова.

Гүлнара Атамкулованын айтымында, иниси Замирбек Атамкулов үстүбүздөгү жылдын 9-майында байланышка чыккан.

"9-майда социалдык тармактар аркылуу балдарыма "братан как дела?" деп жазыптыр. Мен деле жазып жатам, бирок мага жооп кайтарбай жатат. Атамдын карындашынын балдары 2014-жылы Екатеринбургдагы аэропортто иштеп жатканын көрүшүптүр. Андан бери кайда жүргөнү, эмне иш кылып жүргөнү белгисиз", - деди Атамкулова.

Буга чейин, 76 жаштагы апанын видео кайрылуусу интернетке тараган. Азыркы тапта интернет колдонуучуларынын арасында кызуу талкууга алынууда. Ал эми ИИМдин Орусиядагы өкүлү Аскат Алиев дайынсыз делген Замирбек Атамкуловду издөө иштери жүрүп жатканын айтты.