Алмазбек Атамбаев: "Таза шайлоо - мамлекетти туруктуу өнүктүрүүнүн өбөлгөсү"

"Таза шайлоо - мамлекетти туруктуу өнүктүрүүнүн өбөлгөсү" деди бүгүн, 14-майда “Ала-Арча” мамлекеттик резиденциясында КРны туруктуу өнүктүрүү стратегиясы боюнча Улуттук кеңештин жыйынында президент Алмазбек Атамбаев. Айтымында, бийликтин булагы эл болгондуктан, өлкө жетекчилигин эл өзү шайлап алгыдай болуш керек.  

“Эл парламентти өзү таза шайлап алганына ишенсе, парламент шайлаган өкмөткө да ишенет. 2015-жылда өтчү парламенттик шайлоого, 2016-жылдагы жергиликтүү кеңештин депутаттарын шайлоого, ошондой эле 2016-жылдагы президенттик шайлоого даярдыкты бүгүндөн баштап жатабыз. Таза шайлоо өткөрүүгө кетчү каражаттарды, убакытты аябаш керек”,- деди мамлекет башчы.