Социалдык камсыздоо департаменти: "Бизге тубаса майып эненин президентке жазган каты боюнча билдирүү же сунуш келген эмес"

Президенттин коомдук кабылдамасына эки баласы менен кайрылган тубаса майып эненин каты Социалдык камсыздоо департаментине келген эмес. Мындай маалыматты бүгүн, 23-майда SUPER.KG порталына Эмгек жана социалдык коргоо министрлигинин алдындагы Социалдык камсыздоо департаментинен билдиришти.

"Президентке кат аркылуу кайрылып, жардам сураган тубаса майып эненин каты бизге келген эмес. Насиба Ажибекова бизге келген. Бирок ал турак жай маселеси менен кайрылган. Анын бул көйгөйүн чечип берүү биздин ишмердүүлүгүбүзгө кирбейт. Ал үчүн ал туруктуу жашаган жериндеги администрацияга же Бишкек шаарынын мэриясына кайрылса болот", - деп билдирди мекеменин жетектөөчү адиси Жаныгүл Мелисбек кызы.

Эске салсак, буга чейин Насиба Ажибекова "президентке кат менен кайрылсам, коомдук кабылдамада иштегендер "биз сага жардам бере албайбыз, президент да жардам бере албайт" дегенин айткан. Ал эми президенттин коомдук кабылдамасы "тубаса майып эненин көйгөйү боюнча тиешелүү тараптарга сунуш берилген" деп билдирген.