1-июндан тарта Орусияда кыргыздар такси кызматында улуттук күбөлүк менен иштей албайт

2017-жылдын 1-июнунан тарта 2013-жылы 7-майда кабыл алынган Орусиянын "Жол коопсуздугу жөнүндө" федералдык мыйзамына жана Орусия Федерациясынын административдик укук бузуулар Кодексине киргизилчү өзгөртүүлөр тууралуу" нормасы күчүнө кирет. Ага ылайык, чет элдик жана эл аралык айдоочулук күбөлүктүн негизинде транспорттук каражатты башкаруу менен байланышкан ишмердүүлүктү жүргүзүүгө тыюу салынган. Бул тууралуу SUPER.KG порталына Кыргыз Республикасынын Миграция кызматынан билдиришти.

"Чет элдик айдоочулук күбөлүктүн негизинде жеке ишмердүүлүк менен алектенген айдоочуларга 5 миңден 15 миң рублга чейин айып салынат. Чет элдик жаран транспорттук каражатты башкарууга байланыштуу жеке ишмердүүлүгүн жүргүзүү үчүн Орусиянын айдоочулук күбөлүгүн алышы зарыл. Ал үчүн жаран Жол кыймылынын коопсуздугу боюнча мамлекеттик инспекцияга арызы менен кайрылышы керек. Экзамендерди ийгиликтүү тапшыргандардын гана күбөлүктөрү алмаштырылат. Ал эми Орусиянын эл аралык келишимдерине ылайык талапка жооп бербеген чет элдик айдоочулук күбөлүктөр алмаштырылбайт", - деп билдиришти Миграция кызматынан.

Ошондой эле өзгөртүүлөргө ылайык, унааны жеке өзү үчүн айдаган айдоочулар өзүлөрүнүн улуттук айдоочулук күбөлүктөрүн колдоно алышат.

"Бул өзгөртүүлөрдүн эл аралык каттамда жүргөн транспорт каражаттарына тиешеси жок. Бул кырдаалга байланыштуу тоскоолдуктарды жокко чыгаруучу компромисстик сунуш киргизүүнү туура көрүп жатабыз", - деп кошумчалашты кызматтан.

Эскерте кетсек, Кыргыз Республикасынын Орусиядагы элчилиги Орусияда чет өлкөнүн айдоочулук күбөлүгү менен иштегендер 1-июндан тарта жумушка чыга алышпастыгын кабарлаган.
Ал эми Мамлекеттик думага чет элдик айдоочулук күбөлүктөрдү алмаштырууну дагы бир жылга узартуу сунушталган, азырынча сунуш ишке аша элеги белгилүү болду.