"Түндүк электр" ишканасы Патрулдук милиция башкармалыгынын карызы үчүн электр жарыгын өчүргөнү жатат

26-майда "Түндүк электр" ишканасы дебитордук карызы үчүн Бишкектеги шаардык ички иштер башкармалыгына караштуу Патрулдук милиция башкармалыгынын электр жарыгын өчүрүүнү пландоодо. Бүгүнкү күндө башкармалыктын карызы 715 миң сомду түзөт. Бул тууралуу аталган ишкананын басма сөз кызматы бүгүн, 25-майда SUPER.KG`ге билдирди.

"2017-жылдын төрт айынын ичинде аталган абонент 505 миң сомго электр энергиясын колдонгон, анын ичинен 62 миң сому гана төлөнгөн. Андыктан карыздарды төлөшү үчүн ишкана ушундай чараларга барууга аргасыз", - деп билдирди басма сөз кызматы.

Аталган башкармалыктын электр жарыгы абоненттин өзүнүн балансындагы №1576 трансформатордук көмөкчордон менен камсыздалынат. Ушул эле көмөкчордондон Васильевский тракт жана Фучик көчөлөрүнүн участогунда жайгашкан жол чырак электр энергиясы менен камсыздалган. "Түндүк электр" Патрулдук милиция башкармалыгынын электр жарыгын өчүрүү жол чырактын да өчүрүлүшүнө алып келерин эскертет.