"Бишкектеги №3-балдар ооруканасынын дарыгерлери 4 күн диагноз коё алышпай карындашым көз жумду" дейт кайтыш болгон кыздын агасы

Бишкектеги №3-балдар ооруканасына жаткырылган 5 жаштагы Нуркыз Сыдыкова 23-майда көз жумган. Анын агасы Изат Сыдыков карындашынын каза болушуна дарыгерлер күнөөлүү экенин айтат. Анын билдиришинче, аталган оорукананын Неврология бөлүмүнө 19-майда келип түшкөн кызга дарыгерлер 4 күн бою так диагноз коё алышкан эмес.

Изат Сыдыков башка бейтаптарда дал ушундай окуя кайталанбашы үчүн дарыгерлердин үстүнөн укук коргоо органдарына арыз жазарын SUPER.KG порталына билдирди.

"19-май күнү Бишкек шаарындагы №3-балдар ооруканасына карындашымды алып барганбыз. Талма оорусу кармап калды эле. 4 күн аралыгында эч нерсе кылбай, так диагноз коюп беришкен жок. 23-майда айдай карындашыбыздан айрылып калдык. Дарыгерлер карындашымды сактаганга аракет кылышкан жок. Кайрылганыбызга 4 күн болгон, бирок ак же көк деп коюшкан жок.

Буга чейин да талмасы кармаган. Эки жолу “Тез жардам” чакырганбыз, алар эсине келтирип кайра кетишкен. Үчүнчү жолу дарыгерлерге ишенип ооруканага алып барганбыз. Алар эч жери ооруган жок деп айтышкан. Апам чыркырап жатат. Ал эч жерге арызданбайм дейт, бирок мен башкалардын карындаштарын ойлоп жатам. Дарыгер кеч болгондо кечирим сурады. Бирок карындашым кайра келбейт", - дейт ал.