Жогорку Кеңештин комитети Жылдыз Мусабекованын журналистти коркутуп, мазактаганы боюнча маселени карабай, фракцияга жөнөттү

КСДПнын депутаты Жылдыз Мусабекованын журналист Үпөл Анаркулованы коркутуп, мазактаганы боюнча маселени парламенттеги тийиштүү комитет карабай, фракцияга жиберди. Бул тууралуу 25-майда журналист SUPER.KG порталына айтып берди.

Анаркулова Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана регламент боюнча комитетинин төрайымы Асел Кодуранованын атынан келген жооп тууралуу төмөнкүлөргө токтолду.

"Жооп катары келген катта депутаттык этика кодексине ылайык, "депутат өзүнүн сөзүндө орой, кемсинтүүчү сөздөрдү колдонбоосу, одоно сөздөрдү айтпашы, мыйзамсыз иш-аракетке чакырууга жол бербеши керек" деп көрсөтүлгөн. Ошондой эле Депутат Мусабекованын жүрүм-туруму фракция жана партиянын жана жалпысынан Жогорку Кеңештин аброюна таасир этерин белгилеп, аталган кайрылуу катка тиешелүү чараларды көрүү үчүн КСДП фракциясынын лидери Иса Өмγркуловдун кароосуна жөнөткөнү жазылган. Депутаттын оозго алгыс сөздөр менен сөккөнүн жана коркуткандыгын регламент боюнча комитети "одоно сөздөрдү айтпашы керек" деп эле чектелди", - дейт Анаркулова.

Интернетке депутат Жылдыз Мусабекованын журналист Үпөл Анаркулованы абийирине шек келтирип, телефондон 10 эркекке салып берип зордуктатам деп коркутканы жарыяланган. Мусабекова журналистке андай коркутуу сөздөрүн айтпаганын, аудиожазуу монтаж экенин айткан. Ал эми Анаркулова аудио монтаждалбаганын, сүйлөшүү түз эле телефонго жазылганын билдирген.

Үпөл Анаркулова эл өкүлүнө тийиштүү чара көрүү боюнча президент, парламенттин төрагасы, маданият министри, регламент боюнча комитеттин төрайымына кайрылуу жасаган. Президенттин басма сөз кызматынын башчысы Алмаз Үсөнов журналисттин кайрылуусу президенттик аппаратта караларын кабарлаган.

Ушул жылдын 12-майында Анаркулова Жогорку Кеңештин депутаты Жылдыз Мусабекованын коркутуп, мазактаганы боюнча президент Алмазбек Атамбаев, Жогорку Кеңештин төрагасы Чыныбай Турсунбеков, КСДП фракциясынын лидери Иса Өмγркулов, Жогорку Кеңештин регламент боюнча комитетинин төрайымы Асел Кодуранова, маданият, маалымат жана туризм министри Түгөлбай Казаковго кайрылуу кат жибергенин маалымдаган.

КСДП фракциясынын жыйындарына Жылдыз Мусабекова эки ирет катышпай, маселе каралган эмес. Анда фракция лидери Иса Өмγркулов депутаттын ооруп калганын айткан.