Кайрат Нуртастын концертинен фоторепортаж жана андагы кызыктуу көз ирмемдер

Бишкектеги Спорт Ордосунда атактуу казак ырчысы Кайрат Нуртастын концерти өттү. Концерттин башталышында Маданият, маалымат жана туризм министри Түгөлбай Казаков ырчыга каалоо-тилектерин айтып, өзүнүн китебин белекке берди. Ырчынын жөнөкөйлүгүн, элге жакындыгын мындан билиңиз, кайсы күйөрманы ага гүл сунбасын баарын кабыл алып, беттеринен өөп жатты. Ошондой эле аны менен сүрөткө түшөм деп жанына баргандардын эч биринен баш тартпай убактысын бөлүп сүрөткө түшүп берди.

Кайрат Нуртасты жаштар менен катар улуу муундун өкүлдөрү дагы жакшы көрүшөрүнө бүгүнкү концерттеги көрүнүштөр далил болду. Себеби көрүүчүлөрдүн катарын 70-80 жаш курагындагы апалар толуктап, музыканын катуу добушуна карабай концерттин аягына чейин отуруп көрүштү. Жашы 80ге жакындап калган апа концерт аяктаганда сахна артына өтүп, "Кайрат баламды көрөт элем" деп ал отурган гримдөөчү бөлмө тарапка кирип кетти.

Концерттин жүрүшүндө Кайрат Нуртас кичинекей ырчы Айдин Нурдинов менен "Аурмайды журек" ырын чогуу аткарып, ага үстүндө кийип жүргөн костюмун белекке тапшырды.

Кечеде Кыргыз ырчыларынан "Нон-стоп" дуэти, Анжелика Бекболиева, Нурлан Насип, Гүлжигит Калыковдор ырдашты. Кайрат Нуртастын Нурлан Насип менен бирге анын "Бүгүн сенин туулган күнүң" деген ырынын аткаруусу жогорку деңгээлде болуп, көрүүчүлөр чогуу ырдап жатышты. Концерттин соңунда ырчынын күйөрмандарынын тобу сахнага чейин чыгып жанына барышып, башкалары эшиктен аны күтүп жатышты.