Орусия патриархы Кирилл: "Биз диний экстремизм деген сөздөн качып келебиз"

“Ислам жана православ салттуу диндери тынчтыктын жана ынтымактын негизинде коомду бекемдөөдө мамлекеттин өнөктөшү болоруна ишенем”, - деп билдирди премьер-министр Сооронбай Жээнбеков 28-майда Бүткүл Орусия патриархы Кирилл менен жолугушууда.

Патриарх Кирилл Бишкекке расмий сапары менен келген.

“Кыргыз жеринде православ экинчи масштабдуу конфессиялардын бири жана мекендештерибиздин диний жашоосунда өзгөчө мааниге ээ. Сиздин сапарыңыз мусулмандардын Рамазан айынын алгачкы күндөрүндө болуп жаткандыгы жакшы жышаан. Ислам жана православ эриш аркак жүрүп, биздин коомдун диний өнүгүүсүнүн негизин түзөт. Азыр салттуу баалуулуктарды сактоо жана өнүктүрүү маселеси курч экени маалым. Ошондуктан өкмөт ислам менен православ дининин лидерлери менен өзгөчө байланыш түзүүнү туура көрөт”, - деди Жээнбеков.

Патриарх Кирилл буларды белгиледи:

"Биз көрүп тургандай, Кыргыз жеринде православ дининин өкүлдөрү өзүн эркин сезип, эч кандай кысымдарга туш болгону байкалбайт. Биз диний экстремизм деген сөздөн качып келебиз, анткени динде мындай көрүнүш болушу мүмкүн эмес. Жараткан бизди экстремизмдин болбошуна чакырат. Ал эми аны колдонгондор болсо башка бирөөлөрдүн эсебинен аны ишке ашырууну максат кылышат. Ушундан улам биз баарыбыз биргеликте экстремизм менен күрөшүүбүз зарыл".