Шри-Ланкада жаратылыш кырсыгынан каза болгондордун саны 164кө жетти (фото)

Катуу жааган жамгырдын кесепетинен Шри-Ланка өлкөсүнүн 14 аймагында суунун деңгээли көтөрүлүп, калктуу аймактарды каптап жарым миллионго жакын жергиликтүү тургундар башка жактарга көчүрүлдү. Кырсыктын кесепетинен 29-майга карата 164 адам каза болгондугу кабарланууда. Бул маалыматтарды дүйнөлүк массалык маалымат каражаттары жазып чыгышты.

“Шри-Ланка аралындагы катуу жааган жамгыр акыркы 14 жылдагы эң коркунучтуу жаан экендигин метеорологдор айтышууда. 2004-жылы да бул аралда суу каптоо, жер титирөө бир убакытта болуп бийик көтөрүлгөн суу көптөгөн турак үйлөрдү жууп кеткен эле. Быйыл 28-майдагы нөшөрлөгөн жаандан суунун бийиктиги 1,2-1,5 метрге көтөрүлгөн. Жаратылыш кырсыгынан эс алуу жайлары, анын ичинде эң кымбат баалуу делген мейманканалар да жабыркаган”, - деп жазышат басылмалар.