Акылбек Жапаров: “Мага кылмыш иши козголгонун интернеттен окудум”

Жогорку Кеңештин “Бир Бол” фракциясынын депутаты Акылбек Жапаров ага карата кылмыш иши козголгону тууралуу маалымат каражаттарынан окуганын айтты. Бул тууралуу ал SUPER.KG порталына бүгүн, 30-майда билдирди.

Анын бул кылмыш иши боюнча маалыматы жок экенин белгиледи. Ошондой эле бул маселе боюнча суракка чакырылбаганын айтты.

Эске салсак, Башкы прокуратура 29-майда УКМКнын материалдарынын негизинде Игорь Чудинов жана Акылбек Жапаровго карата кылмыш ишин козгогон.

“УКМКнын материалдарынын негизинде Башкы прокуратура 29-майда Жогорку Кеңештин "Бир бол" фракциясынын депутаттары Чудинов жана Жапаровго карата Кылмыш-жаза кодексинин 303-беренеси (коррупция) боюнча кылмыш ишин козгоду. Алар өкмөт мүчөлөрү болуп турган маалда 2009-2015-жылдары “Унаа сыноо станциясы” ачык акционердик коомуна 200 миллион сом бюджеттик ссуданы мыйзамсыз бөлүштүргөн жана максатсыз пайдаланган деп айыпталууда. Козголгон кылмыш ишинин негизинде тергөөнү Улуттук коопсуздук мамлекеттик комитети жүргүзөт”, - деп билдирген башкы прокуратуранын басма сөз катчысы Алманбет Абдраманов.