Алмазбек Атамбаев Шри-Ланканын президентине көңүл айтты

Кыргыз Республикасынын президенти Алмазбек Атамбаев Шри-Ланканын батыш, борбордук жана түштүк бөлүктөрүндө болгон жаратылыш кырсыктарынан көптөгөн адамдардын курман болгондугуна байланыштуу Шри-Ланка Демократиялык Социалисттик Республикасынын президенти Майтрипала Сирисенага көңүл айтты. Бул тууралуу президенттик аппараттын басма сөз кызматы билдирди.

"Шри-Ланканын батыш, борбордук жана түштүк бөлүктөрүндө болгон жаратылыш кырсыктарынын кесепетинен көптөгөн адамдардын курман болгондугуна байланыштуу терең кайгыруу менен көңүл айтуумду кабыл алыңыз.

Курман болгондордун үй-бүлөлөрүнө чын ниеттен чыккан көңүл айтуубузду жана колдообузду, ал эми бардык жабыр тарткандарга тезирээк сакайып кетишин каалай турганыбызды билдирип коюуну өтүнөм", - деп айтылат телеграммада.

Айта кетсек, катуу жааган жамгырдын кесепетинен Шри-Ланка өлкөсүнүн 14 аймагында суунун деңгээли көтөрүлүп, калктуу аймактарды каптап жарым миллионго жакын жергиликтүү тургундар башка жактарга көчүрүлгөн. Кырсыктын кесепетинен 29-майга карата 164 адам каза болгондугу кабарланууда.