Тазабек Икрамов, депутат: "Өлкөдө өзү укук коргоо органдары барбы?"

“Күнүнө жол кырсыктары, адам каза болуп жаткан, өлтүрүп жаткан, уурдап жаткан, алдап кетип жаткан... Буларды көрүп бизде укук коргоо органдары барбы деген суроо жаралат”, - деди 1-июнда парламентте депутат Тазабек Икрамов.

"Акыркы убакта табигый кырсыктар, жол кырсыктары, учак кырсыгы катталып, адамдардын үрөйүн учуруп жатат. Балким, бул биздин пейилибизге жараша Жараткандын берип жаткан сыноосу же жазасыдыр. Кырсыктарда тигини же муну айыптоодон алысмын, бирок "сактанганды Кудай сактайт" деген сөз бар. Жаңылыктарды окугандан коркуп калдык. Чынын айтыш керек, жылдын башынан бери статистиканы карап көрсөк, кылмыш фактылары күндөн күнгө өсүүдө. Мыйзам бар, айып төлөм, жазаларды күчөтүү боюнча мыйзамдарды киргизип жатабыз, дагы эмне кылыш керек? Күч органдары бир гана кылмышкерлер менен күрөшпөй анын алдын алуу чараларын да көрүш керек. Шаардагы коомдук унаалардын катышуусундагы жол кырсыктары катталган учурлар да көбөйдү. Айдоочулук тажрыйбасы жетпеген, жаш балдар кичи автобустарды толтуруп алышып, адамдын өмүрү менен ойноп жатышат", - деди депутат.

Икрамов жол кырсыктарын азайтуу үчүн өкмөттүк саат өткөрүп талкуулоону сунуштады.