Ош-Исфана жолунда Патрулдук милициянын кызматкери 12 жашар кызды сүзүп кетти

Ош-Исфана жолунда Патрулдук милициянын кызматкери 12 жашар кызды сүзүп кетти. Бул тууралуу бүгүн, 1-июнда SUPER.KG порталына Ош ОИИБинин басма сөз кызматынан билдиришти.

"Ош ОИИБинин Патрулдук милициясынын кызматкери 31-май күнү жумуштан чыгып үйүнө баратканда кечки саат 20:00 чамасында Ош-Исфана жолунун 1-чакырымында капыстан жолго чыга калган Н.М. аттуу 12 жашар кызды сүзүп кеткен. Жабыркаган кыз ошол замат бейтапканага жеткирилген. Кыздын буту сынгандыгы аныкталган. Учурда анын ден соолугу жакшы", - деп билдирди басма сөз кызматы.

Маалыматка ылайык, аталган факт боюнча териштирүү иштери жүргүзүлүп, кызматтык иликтөө башталган. Унаа башкарып бараткан кызматкер спирт ичимдигин ичпегендиги аныкталган. Ал эми кыздын алган жаракаты боюнча соттук-медициналык экспертиза дайындалган.