Дарактарды кыюуда балапандардын өлүп жатканы, уясынан кулап түшкөнү жашоочуларды катуу нааразы кылды

Бүгүн, 2-июнда Бишкектеги Токтоналиев көчөсүндө дарактарды кыюу учуру коомчулук тарабынан кызуу талкууга алынууда. Дарактардагы күнөөсүз балапандардын өлүп жатканы, уясынан кулап түшкөнү, дарактардын массалык кыйылышы жергиликтүү жашоочуларды катуу нааразы кылды.

Айрымдары жакасын кармап, "тынч жаткан аймакты кыргынга учуратышты" деген ойлорун айтышты. Анткени Токтоналиев көчөсүнөн буга чейин жергиликтүү жашоочулар гана унаалары менен катташчу. Мындан ары бул жол кеңейтилип, таза абаны булгаган унааларга толмокчу. Дарактардын кыйылышы менен анда жашаган айрым куштардын да уясы бузулуп, кээ бирлеринин сары ооз балапандары өлүп жерде жатты. Колго илешип калган уяларды адамдар кайрадан дарактардын шагына илип коюшууда.

Белгилей кетсек, бүгүн жогоруда аталган көчөнү кеңейтүү максатында 143 даана дарак кыйыла баштаган.