"Ата Мекен" Бишкекте дарактардын массалык кыйылышын парламентте көтөрөт

"Ата Мекен" фракциясы Бишкекте дарактардын массалык кыйылып жатышын парламентте талкуулоого кызыкдар. Бул тууралуу депутат Алмамбет Шыкмаматов 2-июнда Чолпон-Атада өткөн фракциянын көчмө жыйынында билдирди. Талкууга Бишкек шаарынын мэри Албек Ибраимовду чакыруу пландалууда.

Фракциянын көчмө жыйынында 3 маселе каралды. Ысык-Көл облусунда экологиялык кырдаалды жакшыртуу боюнча өкмөттүн тийиштүү программасынын аткарылышы талкууланып, облус жетекчисинин, Айлана чөйрөнү коргоо жана токой чарбасы агенттигинин, Архитектура, курулуш жана турак жай коммуналдык чарба агенттигинин, Экологиялык жана техникалык коопсуздук инспекциясынын өкүлдөрүнүн докладдары угулганы маалымдалды.

Депутат Каныбек Иманалиев медициналык туризм багытындагы жаӊы мыйзам долбоорун тааныштырды.

Эскерте кетсек, Бишкек мэриясы "жолду кеӊейтүү" деген жүйө менен Бишкектин Токтоналиев көчөсүндөгү дарактарды кыюуну баштаган.