Өзбекстанда президент Шавкат Мирзийоевге арналган ырларды ырдоого тыюу салынды

Өзбекстандын президенти Шавкат Мирзийоевге арнап ыр ырдоого “Өзбекконцерт” мекемеси тыюу салды. Бул тууралуу Өзбекстандын басылмалары жазып чыкты.

Маалыматта жазылгандай, “Өзбекконцерттин” жетекчиси Азамат Хайдаров айрым аткаруучулар өлкө президентинин ишине тиешелүү видеолорду, адабий нормаларга ылайык келбеген тексттерди колдонууда.

“Ырчылар ырдын клибин монтаждоо учурунда өлкө жетекчисинин ишмердүүлүгүнө таандык видеолорду колдонууда. Бул моралдык-этикалык нормаларга туура келбейт”,- деп билдирет Хайдаров.

Муну менен катар Өзбекстандын маданият министринин орун басары Минходжиддин Ходжиматов да аны колдоорун айткан. "Ырдагысы келген ырчылар өлкө, улут жөнүндө ырдашсын, эч ким аларга тыюу салбайт", - деген пикири менен бөлүшкөн ал.

Буга чейин 49 жаштагы киноактриса жана ырчы Дильфуза Исмаилова президент Шавкат Мирзийоевге арнап “Керемет жердин султаны ден соолукта болсун”, - деген ырды аткарган.