Барымта баасы 1 миллиард доллар. Катар бийлик өкүлдөрүн бошотуп алуу үчүн террорчулар менен келишимге барган

Катар падышалык үй-бүлөнүн мүчөлөрүн жана 50 аскерди Ирактагы барымтадан бошотуу үчүн террорчулар тобуна миллиард долларга чейин төлөп бергендигин “The Financial Times” акча берүүдө катышкан тараптарга таянып жазып чыкты.

Катардын бийлиги аңчылыкка чыгып Иракта колго түшүп калган 26 падышалык үй-бүлөнүн мүчөлөрүн жана Сирияда туткунга алынган 50 аскерди бошотуу үчүн террордук топко 1 миллиард доллар төлөгөн. Бул окуя ушул жылдын апрель айында болгон.

5-июнда алгач Бахрейн, Бириккен Араб Эмираттары, Сауд Арабия, Египет өлкөлөрү Катарды террорчулар менен кызматташты деп дипломатиялык алакасын үзүштү. Кийинчерээк дагы Ливия, Мальдив, Йемен өлкөлөрү да мамилесин чектеген. Мындан кийин гана Катардын террордук уюмдарга акча бергендиги айтыла баштады.

"5-июндагы 5 мамлекеттин Катар менен мамилени үзгөндүгү тууралуу маалыматтардан соң Катардын фонддук рыногу төмөндөп кеткен. “QE All Share'нин" фонддук индекси 7,6 пайызга түшүп, “Qatar Ex” жана “QE TR” рыноктук индикаторлору 7 пайызга үлүшүн жоготкон. Катардын жашоочулары соода жайларынан азык-түлүк камдоо үчүн жөнөшсө, бийликтегилер кооптонууга негиз жок экенин айтып, азык-түлүктөн жетишпестик болбойт деп ынандырышууда”, - деп жазылат маалыматта.

Ушул эле маалда эл аралык коммерциялык эмес уюм “WikiLeaks” Твиттерге АКШнын президенттигине талапкерлигин койгон Хиллари Клинтондун катын жарыялады. Анда Катар менен Сауд Арабиясы “Ислам мамлекетине” акча бергендигин АКШ билгендиги айтылат.