Өзбекстандык пенсионер велосипед менен ажылык сапарга аттанды

Наманган облусунун Чартак районунун 75 жаштагы жашоочусу Хусан Хожибаев велосипед менен Сауд Арабиясына жол тартты. Учурда ал Бухара облусуна жетти. Бул маалыматты Өзбекстандын маалымат каражаттары жазып чыгышты.

“Хожибаев велосипед менен жолго 2-июнда чыккан. Ал Түркмөнстан чек арасына 7-июнь күнү кечинде же 8-июндун таңында жетерин айткан. Пенсионер Сауд Арабиясына баруу үчүн Түркмөнстан жана Ирандын жолдорун басып өтүшү керек. Бирок ал бул өлкөлөргө кирүү үчүн виза алган эмес. Анын айтымында анын колунда Өзбекстандан “чыгуу” визасы гана бар экен”, - деп айтылат маалыматта.

Былтыр сентябрда Хусан Хожибаев маркум президент Ислам Каримовдун мүрзөcүнө куран түшүрүү үчүн 500 чакырым жол жүрүп Самаркандга барган. Аксакалдын сапарын интернет колдонуучулары “кичи ажылык” менен салыштырып, ага жаңы велосипед белекке беришкен эле.