Ош шаарында бала бакчанын алдынан айдоочу жөө жүргүнчүнү сүздү. Кырсыкка кабылган аял ошол жерден мүрт кетти

Бүгүн, 7-июнда Ош шаарынын Апсамат Масалиев көчөсүндөгү “Жылдызча” балдар бакчасынын алдынан жөө жүргүнчүнү Nissan үлгүсүндөгү унаа сүзүп, кырсыкка кабылган аял ошол жерден каза болду. Унаанын сүзгөн соккусунан улам жөө жүргүнчү жогору ыргып, артында келе жаткан Toyota Avensis үлгүсүндөгү унаанын маңдайкы айнегине түшкөн. Жабырлануучу "Тез жардам" келгиче оор жаракатынан улам ошол жерден каза болгон.

Бул туурасында SUPER.KG порталына Ош ШИИБинин тергөөчүсү Данияр Маматалиев төмөнкүлөрдү билдирди.

“Окуя бүгүн эртең менен саат 07:00 чамасында катталган. Каза болгон аял 1954-жылы туулган Ош шаарынын тургуну Хапиза Адахамова “Жылдызча” балдар бакчасында ашпозчу болуп иштегендиги аныкталды. Ал эми сүзгөн айдоочу 17 жаштагы Акылбек уулу Темирлан окуя болгон жерден эле кармалган. Учурда адам өмүрүн алган жол кырсыгы боюнча иликтөө иштери башталды”, - деди тергөөчү.

Ал эми окуяга күбө болгон Ош шаарынын тургуну "Жылдызча" бала бакчасы жайгашкан жер тууралуу буларды айтат: "Ушул бала бакчага жакын жашаган жашоочулар, ал жакта иштеген кызматкерлер дайыма эле Ош шаардык мэриясына зар какшап кайрылып келебиз. Бул жер жөө жүргүнчүлөр үчүн абдан кооптуу. Мэрияга кайрылып, бала бакчанын тушуна ылдамдыкты басаңдатуучу дөңсөө коюп берүүнү өтүнүп келебиз. Бирок "эреже боюнча бул жерге дөңсөө жаткырганга болбойт" деп коюп бербей келишет. Мыйзам маанилүүбү же адам өмүрү маанилүүбү? Элдин өтүнүчү аткарылыш үчүн дагы канча адамдын өлүмү далил болушу керек? Бул жерден күнүгө ата-энелер балдарын алып өтүшөт", - дейт шаар тургуну Абдижапар Аккулов.