Санкт-Петербургдагы жардыруудан кийин Орусиядагы Кыргыздарга болгон мамиле начарлап кеткени талкууланды

Москвада 6-июнда Кыргыз жана Орусиянын Тышкы иштер министрлиги бир катар консулдук маселелер боюнча сүйлөшүүлөрдү жүргүздү. Анын ичинде Кыргыздардын Орусиянын аймагында жүрүүсү, чек арадан өтүүсү, жаңы төрөлгөн балдарга туулгандыгы тууралуу күбөлүк алуудагы көйгөйлөр каралды.

Өзгөчө апрель айында Санкт-Петербургдагы метродо болгон жардыруудан кийин Орусиядагы Кыргыздардын укуктук абалы начарлап кеткенине көңүл бурулду. Буга байланыштуу Орусия тарапка Кыргыз жарандарынын укуктарын сактоо тартибин көзөмөлдөө айтылды.

Кыргыз делегациясы тарабынан 2016-жылы август айында Москвадагы өрт кырсыгынан каза болгондордун жакындарына компенсация төлөп берүүнү тездетүү жана 2016-жылдын январь айындагы өрт боюнча иликтөө иштерин аяктоого басым жасалды. Мындан сырткары Орусиянын Кыргыздагы элчилигинин кызматкеринин катышуусунда Бишкекте болгон жол кырсыгы, Орусияда камакка алынган, каза болгон Кыргыздардын маселелери талкууланды.

Эскертсе кетсек, 2016-жылы 31-январда Москвадагы Стромынка көчөсүндө өрт чыгып 12 адам каза болгон. Анын 8и Кыргыз жараны болгон. Ал өрттөн кийин жүргүзүлгөн текшерүүлөрдөн соң шаардык прокуратура "мыйзамсыз миграция" беренеси менен кылмыш ишин ачууну талап кылган.

2016-жылы 27-августта Москва шаарында жайгашкан басмаканадан өрт чыккан. Анда 17 Кыргыз кыз-келиндери каза болгон.

2017-жылы 16-февраль күнү Бишкектеги Фучик көчөсүндө жол кырсыгы болгон. Анда Тойота Прадо үлгүсүндөгү унаа менен Мерседес Бенц Спринтер унаасы сүзүшкөн. Анда "Мерседестин" айдоочусу, Кыргыз жараны 62 жаштагы Евгений Лексиндин баш мээси жабыркап, ооруканадан каза болгон. Ал эми орусиялык элчиликтин кызматкери, Тойота Прадо унаасынын айдоочусу Виктор Пуховдун жамбаш сөөгү сынган. Кырсык түшүрүлгөн видеодо элчиликтин унаасы жол чырак кызыл күйүп турганда катуу ылдамдыкта келип, жүк ташуучу Мерседести сүзгөн. Орусиянын тийиштүү органдары иликтөө иштерин жүргүзгөндөн кийин сот Орусияда өтөрү маалымдалган.