Сергей Шойгу: "Кыргыз менен Тажикстанда Орусиянын аскердик таасири күчөйт"

Орусия Кыргыздагы жана Тажикстандагы аскердик базаларын аскердик куралдандыруу жаатындагы иштерин өркүндөтүүнү улантат. Бул тууралуу Шанхай кызматташтык уюмунун Казакстанда өтүп жаткан саммитинде Орусиянын коргоо министри Сергей Шойгу билдирди. Бул тууралуу 7-июнда орусиялык басылмалар жазып чыгышты.

Сергей Шойгу Орусия террордук аракеттерди Ооганстандан Борбордук Азияга өтүүсүнө каршы аракеттерди көрүп жатканын, бул максатта Кыргыз мамлекетиндеги жана Тажикстандагы Орусиянын аскердик базалары жаңы аскердик техникалары менен камсыз болгонун белгилеген.

Министр "Ислам мамлекети" террордук уюмунун бир гана Сирия жана Ирак менен чектелбегенин, аталган уюмдун согушкерлери Ооганстанда дагы бар экенин айткан. "Ооганстандагы кырдаал начарлап жатат. АКШ баш болгон эл аралык коалициянын операциясы өлкөгө тынчтыкты алып келген жок", - деди Сергей Шойгу.

Шойгу Ооганстанда Ислам мамлекетинин согушкерлеринин саны 3 жарым миңден ашып жатканы коңшу мамлекеттер үчүн өзгөчө кооптондурууну жаратарын кошумчалаган.