Экс-министр Жамал Ташибекова 6 айдан бери Сооронбай Жээнбековдун кабыл алуусуна кире албай жүргөнүн айтты

Кыргыздын мурдагы тышкы иштер министри Жамал Ташибекова 2016-жылдын декабрь айынан бери премьер-министр Сооронбай Жээнбековдон кабыл алуусун суранып, оңдуу жооп ала албай жатканын 8-июнда маалымат жыйынында билдирди.

"Мен 7 айдан бери Өкмөт үйүнө Сооронбай Жээнбековдун атына 9 жолу кат жаздым. Катта мени кабыл алуусун өтүнгөм. Ага менин катымды жеткирбей жатышабы билбейм, ушул убакытка чейин кабыл албай жатышат. Болгону сиздин катыңызды башка министрликке жөнөттүк, ошолор байланышат сиз менен деген жооптор келет. Мен Жээнбековдун өзүнө киришим керек, мурдагы министр катары сүйлөшчү сөзүм бар. Мүмкүн маалымат каражаттары аркылуу кайрылсам кабыл алар деп бүгүнкү жыйынды уюштурдум",- деп кошумчалады ал.

Маалымат жыйын башталарда премьер-министрдин маалымат катчысы Чыңгыз Эсенгулов да келип, Ташибекова менен өз ара сүйлөшүп SUPER.KG'ге төмөнкүлөрдү айтты.

"Мен Жамал Ташибекова менен сүйлөшүп, катты качан, кайсы даректерге жазганын тактап жазып алдым. Эмне үчүн кабыл алынбагандыгын тактап маалымат беребиз", - деди Эсенгулов.

Эскерте кетсек, учура 79 жашка чыккан Жамал Ташибекова 1980-1986-жылдары Кыргыздын тышкы иштер министри болуп иштеген.