"Апа, мени кечириңиз" деген видеокайрылуунун ээсин УКМК териштирүүдө

8-июнда колуна автомат кармап алып апасынан кечирим сураган белгисиз жарандын видеокайрылуусу интернетке тарады. Кайрылууда кыргыз тилинде сүйлөгөн белгисиз жаран көз айнек тагынып, бети-башын чүмбөттөп алганын көрүүгө жана артында ок атылып жатканын угууга болот. Учурда УКМК бул боюнча териштирүү иштерин жүргүзүп жатканын мекеменин расмий өкүлү Рахат Сулайманов SUPER.KG'ге билдирди.

Апасына кайрылган тасмада анын: "Менин убакытым аз, бизди курчап алып аткылап жатышат. Тирүү калбайт окшойм. Апа, мени кечирип коюңуз, бул жерге келип туура эмес кылыптырмын. Булар күнөөсүз балдарды өлтүрүшүп, аялдарды зордукташат экен. Эмне үчүн согушуп жатканымды билбейм, бул биздин согуш эмес", - деп айтканы угулат.

Кайрылуу кайсы мезгилде жана кайсы жерде тартылганы азырынча белгисиз. Ал эми социалдык тармактагы колдонуучулар видеокайрылууда сүйлөп жаткан адамды "ролун жакшы аткарган артист экен" деп талкуулашууда.

"Негизи автомат, куралдын үнү микрофондун үнүн угузбай коюшу керек болчу. Ал видеонун үстүнөн үн режиссёру иштеп чыккандай сүйлөгөн адамдын сөздөрү даана угулуп жатат. Кийимдери таза, адатта андай жерде боз-ала чаң болсо керек. Жардыруу маалында камера чайпалбай турат, катуу калчылдамак да...", - деген пикирлерди калтыргандар бар.