Аксыда суунун деңгээли көтөрүлүп, жээкке жакын жайгашкан күйдүргү оорусунун очогу жайгашкан жерге жетти

Жалал-Абад облусунун Аксы районуна караштуу Авлетим айыл аймагында суунун деңгээли көтөрүлүп, жээкке жакын жайгашкан күйдүргү оорусунун очогу жайгашкан жерге жетти. Бул тууралуу бүгүн, 9-июнда Өзгөчө кырдаалдар министрлигинин басма сөз кызматы билдирди.

Маалыматка ылайык, күйдүргү очогу 50 чарчы метр аймакты түзөт.

"Күйдүргү жарасынын очогу көмүлгөн жерди коргоо үчүн жээкти бекемдөө иштерин ушул жылдын 10-июнуна чейин тез арада аткарууга алуу жагы райондук мамлекеттик администрациясынын Жарандык коргонуу башчысына жана Жалал-Абад облустук ветеринардык жана фитосанитардык коопсуздук боюнча инспекциясынын башчысына атайын эскертме менен милдеттендирилген", - деп билдирди басма сөз кызматы.

Аталган окуя боюнча Өзгөчө кырдаалдар министрлигинин райондук бөлүмүнүн башчысы Эрмек Тойчубековго байланышканыбызда учурда 3 оор техника тартылып, таш, шагыл төгүү иши башталганын айтты.