СОБРдун командири: "Сооронбай Жээнбеков Июнь коогалаңында эки элди ынтымакка чакырып, тынчтыкты камсыздаган"

2010-жылдагы Июнь коогалаңы тууралуу ИИМдин Түштүк аймагы боюнча атайын операцияларды аткаруу командири, Ош облусунун ички иштер башкармалыгынын СОБР командири болуп турган Камчы Зикиров мындайча эскерет. Анын айтымында, 2010-жылдын 10-июнунда түнкү саат 22:30-23:00 чамасында Ош облустук ички иштер башкармалыгынын нөөмөт бөлүмүнөн коркунуч сигналы келген. “Дароо эле Ош шаарындагы өзүбүздүн бөлүмгө келдик. Ошол учурда нөөмөттө Болот Нааматов деген жигит турганын көрдүк. Аны менен чогуу өздүк курамдын балдарын топтодук. Балдарды алып, Ош облустук ИИБ имаратына бардым. Катарга тизилүүнү аянтта кылабыз дегенинен улам биз Ош шаарынын борбордук аянтына, Ош облустук мамлекеттик администрациясынын имаратын көздөй бардык. Өздүк курамды алып аянтка барсак, ал жерде ошол убактагы Ош ОИИБинин жетекчисинин орун басары, милициянын полковниги Таалай Акбаев жана губернатор Сооронбай Жээнбеков турушуптур. Сүйлөшүп турганыбызда аянтка айнектери сынган 1-2 жеңил унаалар келип калды. Алар "Алай" мейманканасынын жанында өзбек улутундагы адамдар тосуп алышып өткөрбөй жатышат, биз качып өтүп келдик" деп айтышты. Ошол эле замат Сооронбай Шариповичтин көрсөтмөсүнүн негизинде өздүк курамды алып “Алай” мейманканасына бардык. Жээнбеков бизге "элди тынчтык жолу менен таркатып, баш аламандыкка жол бербегиле" деген буйрукту берди", - дейт Зикиров.

Анан алар «Алай» мейманканасына автобус менен барышканын, ал жакта Навои менен Курманжан датка көчөлөрүнүн кесилишинде эл аябай көп чогулуп, темир тосмолор менен жолду тосуп, ызы-чуу болуп турушканын билдирет. Чогулган эл ошол жердеги күйүүчү май куюучу жайдын, филармониянын бир аз бөлүгүн өрттөп да жиберишкенин көрүшөт. Ал жерге Ош ШИИБинин башкармалыгын башчысы, полковник Ш.Зулимов, анын орун басары Р.Усманов да барышкан. Алар чогулган эл менен сүйлөшүүгө аракет жасашканы менен, эч кандай майнап чыккан эмес. Анан бир маалда Ш.Зулимов башы жарылып чыкканын эскерет Камчы Зикиров. Чогулган эл милиция кызматкерлерине таш ыргытышат. Акыры аларды милиция кызматкерлери Шайи-Төбө көчөсү тарапка кубалап таркатышат. Анан түнү менен ал жерди кайтарууга алышат.

Таң атканда Зулимов ошол жерде жакын жайгашкан студенттердин жатаканасында студенттер калып калганын билдирет. Муну уккан Сооронбай Жээнбеков ал студенттерди чыгарып, облустук администрациянын ары жагындагы залга алып келгиле деген буйругун берет. Натыйжада студенттер бошотулуп, айтылган жерге жайгаштырылат. "Андан кийин Сооронбай Шарипович ошол жерден жолугуп, “Черемушка” районундагы “Сема” балдардын жатак мектебинде окуучулар мугалимдер менен кошо калып калгандыгын айтып, чыгаруубузду буюрду. Аскер бөлүгүнүн кызматкерлери алардын оор техникалары менен кошо барып, окуучуларды жана мугалимдерди автобустарга салып, аскер бөлүгүнө алып барып жайгаштырдык", - деп белгилейт Камчы Зикиров.

Анын эртеси 11-июнда облустук оорукананын имаратын кайтаруу буйругун аткарышат. Ал жерге барганда дагы анын жанындагы жатаканалар, жатаканадагы эл менен анын артындагы көп кабаттуу үйлөрдүн тургундарын кошо тынчыраак жерге алып чыгуу үчүн Фуркат айылына алып барып жайгаштырышат.

Анан 12-июнь күнү шаарда "Өзбекстандан 2000дей согушчан Ошту көздөй келет экен" деген каңшаар кеп тарайт. Мындай кепти уккан айрым ошол убактагы чиновниктер Ош шаарынан үй-бүлөсүн алып качышканын эл азыр да айтып жүрүшөт. Ал чиновник азыркы тапта да сыртта качып жүрөт. Ал эми Сооронбай Жээнбеков тескерисинче элге тирек болуп турат. Өздүк курамдын балдары керектүү ок-дарылар менен камсыздалып, ИИБинин имараты курчалып, посттор коюлат. "Эртең менен таң атып калган кезде ошол учурдагы губернатор Сооронбай Шарипович өздүк курамды алып, шаарды кыдырып, элден кабар алуубузду айтты. Өздүк курамды полктун автобусуна салып, Акбаев да биз менен чогуу чыгып, Ак-Тилек, Черемушки жана Юго-Восток кичи райондорун айланып, элдин коопсуздугун камсыз кылдык. Ошол убакта Жээнбеков облустун губернатору катары эки элди ынтымакка чакырууда, элдин биримдигин сактоодо абдан чоң салымын кошкон", - деп эскерет Зикиров.