Бишкекте аккордеон, гитара, комуздун коштоосунда жарамазан айткандар 15 күн бою жарамазан айтуу каадасын көрсөтүшөт

Бишкектеги "Ош" базарында улуттук кийим кийген ак калпакчан жигиттер аккордеон, гитара, комуз аспаптарынын коштоосунда жарамазан айтышты.

"Биз өлкөнүн ар кайсы аймагынан чогулганбыз. Баарыбыз чыгармачылык менен алектенип жүрөбүз. Ортодо чогулуп жарамазан айтуу каадасын жандандыруу максатын көздөп, жаштарга жарамазанды айтуу эрежесин көрсөтүүнү планга койгонбуз. Буга чейин ар кайсы жерде акча чогултуу максатында жарамазан айтып элдин нааразы болгонун көрүп калган элек. Биз 15 күн бою катуу даярдандык. Элдик обонго салынып айтылып жүргөн ыргак угуп турган элди өзүбүзгө тартуу башкы максатыбыз болду", - деди жарамазанчы Дамир Сейдимырзаев.

Маалыматка ылайык, жарамазандан түшкөн каражаттын бир бөлүгү аз камсыз болгон үй-бүлөлөргө кайрымдуулук иретинде таратылмакчы.

"Эл абдан жакшы кабыл алып жатат. Айрым адамдар токтотуп алып ыраазычылыктарын айтышууда. Алдыда 15 күн бою күн-түн дебей салтты жандандыруу аракетин көрөбүз", - деп кошумчалады Сейдимырзаев.